بەپێی ڕاگەیاندنی پەیوەندییە گشتییەکانی زانکۆی کوردستان، لە کۆنفرانسی نیشتمانیی لێکۆڵینەوەکانی گەڕووس کە لە زانکۆی کوردستان بەڕێوەچوو، دکتۆر سەید ئەحمەدڕەزا خزری، بەڕێوەبەری گشتیی نووسینگەی وەزاری و ڕاوێژکاری وەزیری زانست، توێژینەوە و تەکنەلۆژیا، بە ئاماژەدان بە توانستە مێژوویی و فەرهەنگییەکانی کوردستان، جەختی لەسەر پێویستیی پێداچوونەوە بە ڕێڕەوی گەشەپێدانی ئەم پارێزگایە و بەرەنگاربوونەوەی ئاڵنگارییەکانی وەک وشکەساڵی، کۆچ و ناهاوسەنگییە بەڕێوەبەرایەتییەکان کردەوە.

ڕاوێژکاری وەزیری زانست لەم کۆنفرانسەدا کە بە مەبەستی ڕێزگرتن لە مێژوو، هونەر و میراتی فەرهەنگی و شارستانیی گەڕووس بەڕێوەچوو، ڕایگەیاند: «گەڕووس تەنیا ناوێکی جوگرافی نییە، بەڵکو چەمکێکی شارستانی و فەرهەنگییە کە لە دڵی مێژووی زاگرۆسەوە لەدایک بووە و ڕەگی لە ناسنامەی ئێرانیدا داکوتاوە.»

ناوبراو بە ئاماژەدان بە مێژووی دێرینی کوردستان لە سەردەمی مادەکانەوە تا ساسانییەکان، زیادی کرد: «ئەم خاکە سەرەڕای پێگە مێژووییە بەنرخەکەی، ئەمڕۆ ڕووبەڕووی گوشاری ئابووری، کۆچی زۆرەملێ، قەیرانی فەرهەنگی و زمانی و کەمبوونەوەی سەرچاوەکانی ئاو بووەتەوە.»

دکتۆر خزری جەختی کردەوە: «بۆ تێپەڕاندنی ئەم دۆخە، دەبێت بەرەو پلاندانانی گشتگیر، پشتیوانیکردن لە پیشەسازییە بچووك و مامناوەندەکان، پەرەپێدانی کشتوکاڵی میکانیزەکراو و ڕێگریکردن لە فرۆشتنی خاوی بەرهەمە ستراتیژییەکان هەنگاو بنێین تا بەهای زیادکراو و قازانجی زیاتر بۆ بەرهەمهێنەران مسۆگەر بکرێت.»

ناوبراو هەروەها بە ئاماژەدان بە پێویستیی پەرەپێدانی ژێرخانەکانی پەیوەندی لەوانە هێڵی ئاسن و بازاڕچە سنوورییەکان وتی: «ئەم ژێرخانانە دەتوانن ببنە هۆی دروستکردنی دەرفەتی کاری نوێ و ڕێگریکردن لە کۆچی بەربڵاو.»

ڕاوێژکاری وەزیری زانست لە کۆتاییدا جەختی لەسەر گرنگیی پاراستنی ناسنامەی فەرهەنگی و مێژوویی ناوچەکە، تۆمارکردنی نیشتمانیی زمانی بیجاڕی و بەهێزکردنی هاوپشتی و دوورکەوتنەوە لە سیاسەتکردن کردەوە و وتی: «بە ڕوانگەیەکی عەقڵانی و کردارگەرایانە دەتوانین بگەینە گەشەپێدانی بەردەوام و خۆشگوزەرانیی خەڵکی کوردستان.»